რუსეთმა ახალი ხელშეკრულება გააფორმა ერევანთან. როგორც ამბობენ, ამ შეთანხმებით მოსკოვი სომხეთის დაცვის ვალდებულების აღებას აპირებს. რატომ აკეთებს რუსეთი ამას? რატომ სჭირდება სომხეთთან ისედაც აწყობილი ურთიერთობის კიდევ უფრო გამყარება და ფორმალურად დამაგრება? რას უნდა ველოდოთ ამ სვლის შემდეგ?
ვფიქრობ, ამ სვლის გაკეთებისას კრემლი არა სომხეთზე, არამედ აზერბაიჯანზე ფიქრობს. რუსეთმა მოახერხა და ჩაშალა თურქეთ-სომხეთის მოლაპარაკებები, გააკეთა ეს მშვიდად და ყვირილის გარეშე - ისე რომ ოფიციალურად მხარსაც კი უჭერდა ამ მოლაპარაკებებს. ახლა რუსეთს სჭირდება, რომ ამგვარი შეთანხმების სამომავლო შესაძლებლობა აღმოფხვრას. ამიტომ, აგვისტოშივე გააფორმებს ახალ ხელშეკრულებას სომხეთთან, დააფიქსირებს სომხეთის ერთგულებას, ვალდებულებებს ერევანსაც დააკისრებს, თავად კი მაშინვე შეტრიალდება და ყარაბაღის კონფლიქტის განმუხტვის მიზნით ბაქოსთან დაიწყებს ვაჭრობას. რუსეთი მზად იქნება, რომ ყარაბაღის 5 რაიონი დათმოს, ოღონდაც ბაქო თავისკენ შეატრიალოს >>>
ბაქოსთვის ძალიან ძნელი იქნება ასეთ წინადადებაზე უარის თქმა. ცხადია, ძირითადი საკითხი იქნება გარანტიები, თუმცა აზერბაიჯანის საზოგადოებრივ აზრზე რუსეთი ძალიან ძლიერად იმუშავებს იმისათვის, რომ გარანტიების მოთხოვნისას ბაქო ძალიან პრინციპული არ იყოს.
Comments