ძვირფასო მეგობრებო,მინდა, მოგილოცოთ ახალი წელი და გისურვოთ დღეგრძელობა, მშვიდობა და წარმატება თქვენს საქმიანობაში!
2014 წელი განსხვავებული იქნება, საზოგადოებას ბევრი პასუხისმგებლობის აღება მოუწევს საკუთარ თავზე.
ეს აუცილებელი იქნება, რადგან ჩვენ გვყავს ხელისუფლება, რომელსაც არ გააჩნია მომავლის ხედვა, არ აქვს მკაფიო ღირებულებები, საკუთარი ჩრდილის ეშინია და ერთ ადამიანს ემონება.
წინ კი გვაქვს მნიშვნელოვანი გამოწვევები: უნდა ჩავატაროთ თვითმმართველობის არჩევნები, უნდა გავუძლოთ რუსეთის ზეწოლას და გავაფორმოთ ევროკავშირთან ასოცირების ხელშეკრულება.
ამიტომ, ახლა მთავარია, გავერთიანდეთ ძირითადი ღირებულებების გარშემო, არ დავუშვათ კორუფციის, ჩამორჩენილობის, სიბნელისა და ძველბიჭური მმართველობის დაბრუნება.
სამოქალაქო საზოგადოების როლი ევროპისკენ მიმავალ გზაზე განუზომლად დიდია! ევროპაში ვერ შევა ბიუროკრატია, ევროპაში საზოგადოება უნდა შევიდეს და ეს სრულიად განსხვავებულ სტანდარტებს მოითხოვს ყოველი ჩვენგანისგან.
და სწორედ ახლა, განსაკუთრებული როლი ახალგაზრდებმა უნდა იტვირთონ - ადამიანებმა, ვისაც არ უცხოვრიათ კომუნისტურ და პოსტკომუნისტურ ჭაობში, რომელთაც არ ახსოვთ, რას ნიშნავს პიროვნების განადგურება, მონობა და სამოქალაქო უპასუხისმგებლობა.
ამიტომ, დროა, რომ მყარად შევთახმდეთ:
- მისაღებია ობიექტური და ინფორმირებული კრიტიკა და არა - მტრობა
- გამოხატვის თავისუფლება მხოლოდ უფლება კი არა, სამოქალაქო პასუხისმგებლობაცაა
- სახელწმიფოს წარმატების გასაღები გაბედული და ინფორმირებული მოქალაქეა
- დაუშვებელია თანამშრომლობა ოკუპანტთან, დაუშვებელია ყოველგვარი ძალადობა
- არჩევნები რაციონალური უნდა იყოს, სახელი და გვარი კი არა, პროგრამები უნდა ავირჩიოთ
- არ უნდა დავაბრუნოთ კორუფცია და ნეპოტიზმი, უნდა შევინარჩუნოთ თანაბარი პირობები თითოეული მოქალაქისათვის
- თავისუფლება შეუძლებელია დამოუკიდებლობის გარეშე და დამოუკიდებლობა შეუძლებელია თავისუფლების გარეშე
- ჩვენი მიზანია თავისუფლება, დამოუკიდებლობა და განვითარება
- ჩვენი პარტნიორი და მეგობარია ყველა, ვინც პატივს სცემს ამ ღირებულებებს
გილოცავთ კიდევ ერთხელ დამდეგ ახალ წელს და გისურვებთ, რომ პიროვნულ ბედნიერებასთან ერთად, მან ჩვენი ქვეყნით სიამაყის გრძნობა დაგვიბრუნოს. გისურვებთ ჩვენი სამშობლოს წინსვლას ევროპული ოჯახისჯკენ - სადაც ისტორიულად არის მისი ადგილი!
ანდრო ბარნოვი
Comments